Mae'r broses lawn gofal a gweddi i ddirnad pwy ddylai fod yn Esgob nesaf Llandaf wedi dechrau
Mae'r broses lawn gofal a gweddi i ddirnad pwy ddylai fod yn Esgob nesaf Llandaf wedi dechrau. Mae'r dasg yn syrthio ar Goleg Etholiadol, sy’n cynrychioli holl esgobaethau Cymru, ac sydd bron yn sicr o gael ei gynnal ym mis Ionawr 2023. Mae yna 12 o etholwyr o Esgobaeth Llandaf (chwe lleygwr a chwe chlerigwr) sydd wedi’u dewis trwy bleidlais ymysg aelodau lleyg a chlerigwyr Cynhadledd yr Esgobaeth.
![](https://llandaff.contentfiles.net/media/images/Llandaff_Cathedral_nave.width-1200.jpg)
Tasg gyntaf etholwyr Llandaf yw llunio proffil, gan fanylu ar anghenion ein hesgobaeth a'r rhoddion rydyn ni’n ceisio eu dirnad yn ein Hesgob newydd. Mae'n hanfodol bod y proffil hwn yn adlewyrchu’n bendant flaenoriaethau ein hesgobaeth wrth inni ddechrau ar y cyfnod nesaf yn ein cenhadaeth, ochr yn ochr â rhoddion a rhinweddau penodol arweinyddiaeth, profiad ac ysbrydolrwydd a fydd yn llywio gwaith yr Esgob newydd yn ein plith. Mae'r etholwyr wedi nodi tri chwestiwn craidd a fydd yn codi i'n hesgobaeth ac i'r Eglwys ehangach, ynghyd â gwahoddiad mwy cyffredinol i ychwanegu sylwadau eraill a allai helpu i ffurfio'r rhan gychwynnol hon o'r broses.
Mae’r etholwyr yn awyddus i ymgynghori'n eang ynglŷn â'r proffil, ar draws Esgobaeth Llandaf a’r tu hwnt, a bydd pob ymateb yn cael ei ystyried. Bydd Arweinwyr a Chadeiryddion Lleyg yr Ardaloedd Gweinidogaeth yn cael neges yn y dyddiau nesaf, yn gofyn iddyn nhw chwilio am ystod eang o safbwyntiau yn eu Hardal Weinidogaeth, a chyfleu’r safbwyntiau hyn i'r etholwyr. Mae'r amserlen yn dynn, ac mae angen cwblhau'r gwaith cychwynnol hwn yn gyflym, am fod yr etholwyr yn dymuno cnoi cil ar yr ymatebion a chreu proffil a all gael ei ddosbarthu i'n hesgobaeth, ein talaith a'r Cymundeb Anglicanaidd ehangach cyn diwedd mis Tachwedd.
![](https://llandaff.contentfiles.net/media/images/xiaoxia-xu-eb8bgHv7A2g-unsplash.width-1200.jpg)
Cadwch lygad am newyddion am yr ymgynghoriad hwn yn eich eglwys leol a'ch Ardal Weinidogaeth yn y dyddiau nesaf, a siaradwch ag Arweinydd eich Ardal Weinidogaeth, eich Cadeirydd Lleyg neu’ch clerigwyr lleol i ddarganfod sut gallwch chi gyfrannu’ch barn, os na fyddan nhw’n cysylltu â chi'n uniongyrchol, neu’n dweud sut gallwch chi ymateb.
Cadwch y broses hon o benodi’n Hesgob newydd yn eich calon, eich meddwl ac, yn anad dim, yn eich gweddïau. Rydyn ni’n ceisio cyfeiriad Ysbryd Glân Duw i arwain etholwyr Llandaf a'r Coleg Etholiadol cyfan, i ddirnad y person iawn i arwain ein Hesgobaeth i'n cyfnod nesaf o waith a thystiolaeth yn enw Iesu.
Rydym yn annog pobl Esgobaeth Llandaf i gynnwys etholiad ein Hesgob newydd yn gyson yn ein hymbiliau preifat a chorfforaethol, gan gynnig y gweddïau hyn...
Dad Tragwyddol, y mae dy Fab yn fugail ac y mae dy Ysbryd Glân yn Dywysydd inni, yn dy drugaredd rho i esgobaeth Llandaf fel ein Hesgob fugail ar ôl dy galon di dy hun, a fydd yn cerdded yn dy ffyrdd di, a chyda golwg cariadus yn gwylio dros dy bobl. Rho inni arweinydd â gweledigaeth i addysgu dy wirionedd, fel y gall dy Eglwys di yma gael ei hadeiladu a'th enw di gael ei ogoneddu. Gweddïwn hefyd am dy arweiniad i aelodau'r Coleg Etholiadol, a phawb sy'n ymwneud â'r broses o ethol yr Esgob newydd. Gofynnwn hyn oll yn enw Iesu Grist ein Harglwydd.
Amen
Dduw byw,
Rwyt ti'n galw arnom i rannu dy fywyd
ac i rannu dy gariad,
fel y dangoswyd i ni drwy Iesu dy Fab.
Ar yr adeg hon o bontio i'n hesgobaeth
gweddïwn am arweiniad dy Ysbryd Glân,
i bawb fydd yn ysgwyddo'r cyfrifoldeb
ethol esgob newydd.
Trwy weddi,
a chalon sy’n ymddiried yn dy ddibenion i’th Eglwys
boed iddynt adnabod y person rwyt ti'n ei alw i fod yn esgob nesaf i ni,
wrth inni barhau i adrodd stori lawen,
i dyfu dy deyrnas,
ac i adeiladu ein gallu er daioni.
Gofynnwn hyn drwy Iesu Grist ein Harglwydd. Amen.
Dyma aelodau Coleg Etholiadol yr Eglwys yng Nghymru a fydd yn cynrychioli Esgobaeth Llandaf wrth ethol Esgob nesaf Llandaf:
Aelodau lleyg:
Mr Michael Lawley
Dr. Heather Payne
Mr Luca Alexander Sparey
Mrs Julia Plaut
Mrs Moira Randall MBE
Mrs Susan Rivers
Aelodau clerigol:
Y Parchedig Ganon Mark Preece
Yr Archddiacon yr Hybarch Michael Komor
Y Parchedig Ganon Jan Gould
Y Parchedig Zoe King
Y Parchedig Ganon Edwin Counsell
Y Parchedig Peter Lewis