Priodas eglwys ar thema Star Wars i arch-ffans ym Mhontypridd

Daeth pâr o Bontypridd ynghyd i adnewyddu eu haddunedau mewn priodas eglwys ar thema Star Wars dan arweiniad y Parchedig Charlotte Ruston wedi’i gwisgo fel Kylo Ren – mab Han Solo a'r Dywysoges Leia.

Cafodd Eglwys y Santes Catrin ym Mhontypridd ei gweddnewid o eglwys Anglicanaidd draddodiadol yn lleoliad wedi’i ysbrydoli gan Star Wars ar gyfer priodas yr arch-ffans Tina a Kevin Rankin. Un arall o ffans Star Wars, y Parchedig Charlotte, fu’n arwain y briodas a hynny ar ôl cytuno i lywyddu ar un amod – ei bod yn cael gwisgo fel y cymeriad o The Force Awakens, Kylo Ren.

Dywedodd y Parchedig Charlotte, "Gan fy mod i’n ffan Star Wars enfawr fy hunan, doedd yna ddim peryg y byddwn i’n dweud ‘na’ wrth y briodas yma. Cafodd Tina a Kev eu priodi bron 20 mlynedd yn ôl mewn swyddfa gofrestru, ac roedden nhw'n arbennig o awyddus i gael bendith Duw ar eu priodas, ac roeddwn i wrth fy modd yn ei rhoi. Roedd y diwrnod cyfan yn llawn hwyl a chwerthin. Pan soniodd Iesu am lawnder bywyd, dwi’n credu mai dyddiau fel hyn oedd ganddo dan sylw.

"Er inni gael hwyl ac atal realiti er mwyn byw ym myd Star Wars am gyfnod byr, roedd Iesu yng nghanol y cyfan – yn union fel y dylai fod"

Mae Kevin yn aelod o Garrison y Deyrnas Unedig o’r 501 Legion, sef sefydliad rhyngwladol i ffans Star Wars. Mae eu haelodau nhw'n eu disgrifio'u hunain fel 'Dihirod yn Gwneud Daioni’ gan fod yr aelodau’n gwisgo fel dihirod o'r Ymerodraeth Galactig er mwyn codi arian at elusennau. Mae'r Garrison yn rhan enfawr o fywydau Tina a Kev, ac roedden nhw'n awyddus i'w cynnwys nhw wrth i’w priodas nhw gael ei bendithio.

Dywedodd Tina: "Rŷn ni’n ddiolchgar i bawb yn Eglwys y Santes Catrin am ein helpu i adnewyddu’n haddunedau priodas mewn ffordd oedd yn adlewyrchu nid yn unig ein ffydd ni, ond hefyd ein personoliaethau a'n hobïau ni hefyd.

"Roedd y diwrnod cyfan yn llawn llawenydd a mwynhad. Roedd hi'n bendant yn ddiwrnod na fydd neb yn ei anghofio. Rŷn ni'n teimlo'n fendithiol iawn."

Mae'r Garrison ar gael i'w llogi ac mae 100% o'u ffi yn cael ei roi i elusen. Os hoffech chi gael storm trooper yn eich priodas chi, mewn galaeth ymhell, bell i ffwrdd, ymwelwch â nhw yn https://www.ukgarrison.co.uk/501st-uk-garrison.html